Grünkohlessen und Prost Neeijahr

Die erste Veranstaltung des Heimatvereins Schortens im Jahre 2013 mit 60 Gästen setzt die stetig ansteigende Besucheranzahl unserer Aktivitäten fort.

Im Friesenhof Heidmühle bot Rudi Rabe wie gewohnt Kurzweil auf hohem Niveau.

Koom good rin!!! Prost Neei Jahr!!! Bliev gesund!!! Laat di`t good gahn!!! Holl di stief!!!

All de good meent Wünsken vermengt mit Raketenfüürwark un Balleree. Prost Neei Jahr!
Immer wenn dat old Jahr to Enn geiht, dat neei Jahr to`n Griepen nah is, ja denn, denn denk ik daaröver na, watt woll nächsd Jahr up mi, up uns all tokummt. Dat old Jahr hebb ik överstahn mit all de Höchten un mit all de Deepen. Watt hett sük nich allens verännert! Nich all is beter wurden. Ik denk an de Upstannen in Noordafrika, an Lybien un Ägypten Un watt hett dat in Ägypten brocht? Nix! Un watt is bloot in Syrien loos! Al-Assad klammert an sien Posten, dat Volk mutt lieden. Ik denk an de „EURO-Krise“. Griechenland, Spanien un noch mehr Länner hebbt sük gaar mächtig övernohmen. Düskland sall daarför betahlen? Waar wi doch so een flietig Volk sünd. Is ja een Schandaal! Uns Politikers willt woll weten, wat richtig is. Hauptsaak is, uns EURO behollt sien Wert un de mickrig Zinsen för mien beten Geld up Bank stiegt wedder, daarmit ik mi mal een Anzug kopen kann un nich bloot dreei Bomboissis van`n Backer.

Un watt hebbt wi an Höchten hat? De Europameisterschaft in Football, de Olympisch Spelen in England, waar de Elisabeth ut`d Flugzeug sprungen is un hör Diamanthoogtied mit Philipp! Ach, weer dat moi, de Elisabeth in Regen up de Themse schippern to sehn. Dat ik dat noch beleevt hebb! Un of ik noch so old wordt? Bumms! Een Silvesterknaller un de Klocken van uns St.-Stephanus-Kark luckt mi ut dat olle Jahr rut. Van nu an na vörn kieken, so heet dat Motto! Well na vörn kickt, kickt in de Tokunft. Well in de Tokunft kickt, weet noch nich genau wat kummt. Jedereen leggt sük sien egen Sehnsüchten torecht, de he tofaten kriegen will of ok nich. Kummt ok faken daarup an, wu de seelisch Instellung jüst is.

Ik för mien Deel wünsk mi, dat ik mi noch lang sülvst helpen kann un nüms to Last fall. Na ja, de Knoken willt nich mehr so richtig. Dat Genick un mien Kneen doot sehr, aver mit Salv, de ok good för Peer is, help ik mi so good as dat geiht. Bloot nich to de ganz Ollen gehören, ne dat will ik nich. Waar koom ik denn hen, wenn jemand to mi seggt: „Na Opa, hast du dein Testament schon gemacht?“

Ik hebb van uns Stadt noch kien Seniorenpass kregen. Van wegens mit Seniorenpass up Senioren-Koffiefahrt un denn to Middag för de „Silver-Surfer“ de prieswert Seniorenteller serveert kriegen. Un up de Reklaamschau de Anpriesung van Seniorenmatratzen oder Treppliften to hören, un dat för düür Geld! De Reklameminsken sünd ja fiffig: Schlaapt de Tohörer in, priest se „Hallo-Wach“-Pillen an. Un de, de nich tohört of nich tohören willt, worden up de modern Hörapparaten ansproken. „Äußerst preiswert! 4500 EURO! Nur hier und heute zu haben!“ Un wenn de Senioren wedder to Huus anlangt sünd, sünd doch eenig Lüü heel weg begeistert: „Wat weer dat doch för een moien Dag! Schiet up Geld, mitnehmen kannst ja doch nix!“ Mit mi nich!!! Ik bliev bi mien Instellung:

Hörst du ok to Senioren?
Hest du`t ok mit diene Ohren?
Ik kann di noch ganz good hören,
to Senioren will ik noch nich tohören.

Un mit mien Kieken geiht dat good,
nich to groot is de Druck van`t Blood.
Morgens kräftig ut de Büx,
mi fehlt ja sonst ok anners nix.

Dat beten Pien in miene Knoken,
un noch poor anner lüttje Saken.
Ogen to un nich överdrieven,
ik will immer bi de Jungen blieven.